在黄沙坑某处，有座做哩百零年盖老屋。崖兜也唔知老屋里背住了几多代人，也唔知死了几多只人。凿崖闲细盖时候，崖就听讲过里背死了好多人。听崖阿公讲，文革盖时候，里背有只外来盖女知青奔人打死。女知青死盖时候，肚室里还有只细人哩。可惜，细人还唔毛养出来，就劳支老妈做下死铁哩。

　　自从盖只女知青死铁哩之后，夜布时经常都可以听到有细人叫盖声音，行前老屋去听下，也经常听到门柱叽叽嘎嘎盖声音。就凿该年哩，村里背好多只细人哩唔够满月也死铁哩。唔系得病死，就系无缘无故死铁哩。死盖细人，都有一只共同盖地方——细人肚室都有只手印，唔大也唔细，越看越像只女人盖手掌。

　　经过安尼盖事情，村里背好多老人想到死铁盖只女知青，认为系支盖鬼魂唔散。几只老人商量了一下，就去对面盖飞天庙求了一张符头，然后凿老屋门前立了一只石碑，石碑写认：“观音菩萨一位尊神”。讲起来也好奇怪，自从立了只石碑，点了香，请了观音娘之后，老屋里背再也毛传出哪声音，村里背盖细人也毛哪事。就安呢，老屋安静了好几年，观音娘石碑也一直立倒打该。

　　老屋的平静，奔一家五华哥盖到来打破哩。老屋盖后人看到老屋安多年都没有事，又像赚滴钱，于是就把老屋租奔外来盖五华哥。盖着五华哥，系靠电鱼为生盖，经常系下昼时吃了饭，月头落岗盖时候去电鱼；或者系夜布时八九点钟去电鱼，然后凌晨三四点正转屋卡。盖日哩，五华哥正搬落老屋来，就拿脚锄去锄巷历盖草。锄人锄，一唔小心就把观音娘盖石碑锄断哩。讲起来也系好奇怪，观音娘盖石碑奔支锄断盖支时候，老屋盖屋顶冒起一阵白烟。盖只五华哥试到乌身准了一下，鸡妈皮巷来哩，背梅脊梁骨一阵冷汗。五华哥试到一阵阴风吹过来，目珠争兜打唔开。支盖目珠迷了一下，好像看到两只人盖样子，一只大人，女盖；一只细人，唔知系男还系女盖。五华哥也毛去努安多，认为系自家目珠看错哩。

　　就凿盖布暗，五华哥吃饱饭就去电鱼哩。临出门之前，五华哥把屋卡扫齐哩，哪西都收拾到好净。哩布暗，支去溪东盖一条细河里背电鱼。经常听讲溪东盖条细河浸死人，就凿五华哥去电鱼前毛几久哩，闲有只细人奔水浸死。五华哥拿认电鱼机落河去电鱼。正走到河边，就看到河面上有只人头那浮巷来，目金金看认五华哥。五华哥面色立刻就变到好白好白，一阵鸡嘛皮巷来，头拿毛、脚毛系毛都竖起来，毛孔都变得好大。五华哥心里背想：“崖唔系都到鬼挖？”不过，五华哥经常走夜路，也唔系好惊撞鬼哩兜事情。于系，五华哥拿电鱼机前面盖电灯再仔细照下水面盖着人头拿，原来系一只玩具娃娃。五华哥吐了一口气，心放落来咯，之后就落水去电鱼。五华哥唔知，支转身落河去电鱼盖时候，支后面真系坐人一只细人哩。

　　盖布暗，五华哥电鱼电到四电零正转屋卡。五华哥落该条细河电鱼，电来电去都毛电到几条鱼。最后，凿细河入大河该河口该只地方，奔支电到一只团鱼。就安尼，五华哥就转屋卡来。盖下既天时，四点零，天空闲系好暗好暗盖。五华哥拿认电鱼机前面盖灯坐手电，行认转屋卡。走下走下，五华哥紧系觉得后背凉风阵阵。走落村里背去，连平时好合叫盖狗都毛声毛气。五华哥想起看到盖着玩具细人盖头拿，鸡嘛皮又巷来哩。于是，就加快脚本转屋卡去。

　　五华哥行到自家门前，正想打开家门，突然听到屋卡里背有细人呢叫，好细声，好像正出世盖系人声。五华哥又奔支吓出一身冷汗。支自己安慰自家：“崖去电鱼安久，从来都毛讲都到鬼，哩只世界根本就毛鬼。”五华哥安慰自己盖时候，慢慢拿出锁匙去开门。门正打开啊，一团乌影“呼”一声就从屋里背串出来，飘过五华哥盖头顶，五华哥觉得面都麻哩，不由自主就坐到地上去。“喵……”五华哥后面传来一声猫叫。五华哥转过头拿去看，原来系一条起码有七八斤重盖乌猫。五华哥看到猫，心正定落来。爬巷来去开灯。灯打开之后，看到屋卡里背一团糟糕，全部东西都奔人翻过来。煮食盖锅嘛，着盖衫裤，一团糟糕。凿地泥下，还看到几点好清晰盖血迹。五华哥想下，认为盖系猫捉老鼠，老鼠滴落来盖血。就安尼，支也毛去多想，把东西放好就关灯去睡目。五华哥关铁灯，就听见房间上面盖目棚悉悉索索响，支认为系老鼠作祟，于是骂了一声：“死老鼠，搔早捉条猫来，吃铁奔你！”话讲下铁，棚上真系一滴声都毛，屋卡立刻好安静。五华哥唔知，透过木棚盖条空，有两只目珠目金金望认支。

　　一布夜也系相安无事。好几日都毛哪事。只系布布夜夜五华哥都听到屋顶有猫叫春盖声音，就好像细人哩叫。五华哥对于猫叫春安尼盖声，听多哩，也觉得毛哪西好惊，也唔认真去听。

　　哩日，也系夜晡时七八点钟，五华哥又去电鱼。哩次支去盖地方，安做“三坑水”。黄沙坑盖大人细人都知，“三坑水”系葬最多骨头盎盖地方。一般人中午月头辣辣盖时候，还有夜晡时都唔敢去。老人讲“当昼心，鬼掐针；夜晡时，鬼掐旗。”哩晡暗，五华哥自家一只人又冲认去“三坑水”电鱼。支总系唔相信尼只世界有鬼。支知哪哩好多鱼儿，就去哪里电。

　　哩晡暗，五华哥好有收获。一落“三坑水”其中一条水，就电到一只大团鱼，再落第二条水，电条两三斤重盖滑子。五华哥越电越开心，也唔记得走到那条水去哩，一只沿水上，不知不觉就走到第三条水上哩。第三条水上面，全部系葬骨头盎盖地方。五华哥看到越来越多盖鱼儿，越电越开心。电下电下，突然间听到有人喊支盖名，劳支讲：“安有鱼哩好电？”五华哥电到开心，随口应了一声：“系啊，唔知哪鬼，暗晡夜好多鱼哩好电。”五华哥刚刚讲完一句话，立刻毛都巷来哩，唔敢看周围。支哪起电鱼机两条竹竿，突然间转身，想认用电鱼机电铁奔该只“鬼”。一转过来，哪西都毛！连只鬼影都毛看到！五华哥定下神，望下周围，就系看到一只人！盖只人就凿岭岗顶背看认支，一头吃烟，一头劳支笑。离岭岗毛几远盖地方，一团火。五华哥哩下正想起，哩日村里背有只老人过老，暗晡夜落葬。五华哥心里背暗笑：“自己做西疑神疑鬼？出来电鱼安久，哪盖事情毛遇过？”

　　五华哥心定哩好多，看到第三条水安多鱼儿，就一只沿水上去电鱼。走啊，走啊，电啊，电啊，五华哥也唔知自己走哩几多远。哩盖时候，五华哥突然听到有人凿身边轻轻喊支，五华哥听到有人喊支，就沿人该着声音，一直走。讲起来也系好奇怪，五华哥自己也毛觉得惊，只系对该着声好好奇。走啊，走，走过一只又一只山头，走过一条又一条细河，最后竟然系走转五华哥盖屋卡来哩！

　　五华哥也系好奇怪，努到头先还系凿哪条历里背电鱼哩，哩下做哪西就行转来哩？支拿出锁匙爱来开门盖，突然间又听到屋卡里背有细人叫，五华哥自己劳自己讲：“该条死猫，日日都叫春，叫加两下就打死奔你！”五华哥打开门，开了灯，突然看到饭桌面前坐认一支布娘认，抱认一只细人哩，正在喂细人哩吃奶。盖只布娘人转过头来，满面系血，对五华哥笑了几笑……五华哥立刻就晕了过去。

    五华哥晕落去了，支屋卡门口又有只人出现——就系头先问支“安有鱼哩好电”盖只人。